«Artea, benetakoa denean, beti da entretenimendua»

2016/09/24

Ruth Berlauren esaldi horrekin laburbildu dezakegu Neighboren astearteko kontzertua. Errenuntziarik gabeko saio bat: umorez, lasaitasunez, urduritasunez, harriduraz. Jada osorik entzuteko aukera duzu gainera. Horrez gain, kontzertuaren aurretik Peio Argiñarenak Euskalerria irratian egin zien elkarrizketa entzun eta bideoan ikus dezakezu. Ostegunean Xabier Sagardiak kontzertu iruzkin ederra egin zuen Diario de Noticiasen eta gaualdiaz gainera egungo euskal kantagintzari buruzko bere gogoetak ekarri zizkigun.
Zapore goxo horrekin, eta geure ekitaldi nagusiak alboratu gabe (liburu aurkezpenak, hitzaldiak, asanbladak) gogoan izan urriak 21a. Neighbor gogoko izan bazenuen presta zaitez Joseba Irazoki eta Jon Mantxi showmanak ikusteko: musika alaia, zoroa, bertutez josia.

Hitzarmen ekonomikoa eta komunitate politikoa

Asteon hiru liburu aurkezpen izango ditugu (begiratu geure ekitaldien saila) eta tartean, Pedro Luis Uriarte etorriko da Ezkerraberri Fundazioak gonbidatuta. Uriate EAE eta Espainiako Estatuaren arteko hitzarmen ekonomikoa praktikan jarri zuenetan bat izan zen. Garaian Ekonomia eta Ogasun sailburua izan zen gainera. Horretaz jardungo du ostegunean: Nafarroak eta EAEk duten hitzarmen ekonomikoaz eta ordezkatzen duten komunitate politikoaz.