1978an Charles Bukowski poeta eta nobelagile honezkero ospetsuak promozio bidaia bat egin zuen Europan Linda Lee bikotekidearekin batera. Bidaia hartan idazleak arbasoen sorlekua ezagutu nahi zuen eta, ahal zuenero, mozkortu. Charles eta Linda Alemaniako Andenach-erako bidean Parisko telebistako literatur saio ezagunenera joan ziren, Nizara desbideratu, Europako literaturzaleekin parranda egin zuten, Dusseldorfen dirua xahutu zuten hipodromoan eta Koloniako katedralera joan ziren.

Bukowski xamurrena dago liburuan, bere buruari irri egiten diona, bere buruari alkoholarekin eta tabakoarekin kalte egiten diona eta bere bikotekide Linda Lee erraietatik maite duena. Bira dokumentatu zuen Michael Montforten dozenaka argazki dauzka liburuak, idazlearen irudi ezagunenak bilakatu dira horietako asko.